ܝܘܡܐ ܕܣܗܕܐ ܐܫܘܪܝܐ ܘܕܟ̣ܪܐ ܕܫܬܐܣܬܐ ܕܠܘܡܕܐ ܐܫܘܪܝܐ ܓܘܢܝܐ

ܩܐ ܕܐܢ̈ܝ ܕܗ̄ܘܐ ܠܗ̄ܘܢ ܛܘܦ̮ܣܐ ܕܕܒ̣ܚܬܐ ܘܐܓ̣ܘܢܐ...

ܒܟܠܝܐ ܗ̄ܘܝܚ ܐܕܝܘܡ ܒܚܫܐ ܩܕ̄ܡ ܕܟ̣ܪܐ ܕܣܗ̈ܕܐ ܕܨܒ̣ܘܬܢ ܟܕ ܒܕܟ̣ܪܐ ܡܐܙܠܬܐ ܝܪܝܟ̣ܬܐ ܡܛܠ ܢܛܪܬܐ ܕܐܝܬܘܬܐ ܘܐܡܝܢܝܘܬܐ ܕܡܡܛܝܬܐ ܡܕܼܝܢܝܬܐ ܘܛܠܒܬܐ ܒܙܕܩ̈ܐ ܢܡܘܣܝ̈ܐ ܕܥܡܢ ܗ̇ܘ ܕܡܩܪܒ̣ܠܗ ܪܒܐ ܩܐ ܒܪ̈ܢܫܘܬܐ، ܘܡܩܪܒ̣ܠܗ ܩܐ ܥܝܪܐܩ ܐܣ̈ܐ ܕܗܝܝܘܬܗ ܡܕܼܝܢܝܬܐ.

ܕܟ̣ܪܐ ܕܫܒ̣ܥܐ ܐܒ (ܛܒܚ) ܡܐܲܪܘܚܐ ܝܠܗ ܠܡܐܙܠܬܐ ܕܥܡܐ ܐܝܟ̣ ܕܒܪܡܙܐ ܝܠܗ ܥܠ ܥܡܠܝܬܐ ܕܒܢܝܬܐ ܕܐܘܚܕܢܘܬܐ (ܐܬܪܐ) ܕܥܝܪܐܩ ܥܠ ܐܣ̈ܐ ܦܠܝܡ̈ܐ ܒܢܝ̈ܐ ܥܠ ܚܘܦܛ̈ܐ ܕܥܩܪܬܐ ܘܡܦܫܪܬܐ ܘܡܪܗܒ̣ܬܐ ܘܛܘܗܡܝܘܬܐ، ܐܘܚܕܢܘܬܐ ܕܥܝܪܐܩ ܦܝܫܠܗ̇ ܒܢܝܬܐ ܥܠ ܙܘܕܘܢܝ̈ܐ ܡ̣ܢ ܥܡܠܝܬ̈ܐ ܕܡܦܫܪܬܐ ܛܘܗܡܝܬܐ ܡܫܘܪܐ ܠܗ̇ ܒܦܪܡܐ ܕܣܡܝܠܐ ܫܢ̄ܬܐ 1933 ܒܙܕܩܐ ܕܥܡܐ ܐܫܘܪܝܐ، ܘܡܢܕܝ ܡܦܫܡܢܐ ܝܠܗ ܩܐ ܕܡܕܥ̈ܐ ܐܢ̈ܝ ܕܡܛܘܝܒ̣ܠܗ̄ܘܢ ܩܐ ܕܗ̇ܘ ܦܪܡܐ ܗܵܠܐ ܦܝܵܫܐ ܝܠܝ̈ܗܝ ܘܪܣܝܟ̣ܐ (ܡܚܘܠܢ̈ܐ) ܓܘ ܪܸܢܝܵܐ ܣܝܣܝܐ ܥܝܪܐܩܝܐ ܘܗܠܐ ܪܢܝܐ ܕܡܪܚܩܬܐ ܘܡܦܫܪܬܐ ܒܥܒ̣ܕܐ ܝܠܗ ܥܒ̣ܕܸܗ ܓܘ ܒܢܝܢܐ ܪܢܝܝܐ ܥܝܪܐܩܝܐ، ܘܗܠܐ ܕܒ̣ܚ̈ܐ ܒܢܦܠܐ ܝܠܝܗܝ ܡܛܠ ܢܛܪܬܐ ܕܐܝܬܘܬܝܗܝ ܓܘ ܛܠܐ ܕܨܦܚܝܬ̈ܐ ܣܪ̈ܝܚܐ ܡܛܐ ܠܗ̄ܘܢ ܘܒܡܛܝܐ ܝܠܝܗܝ ܫܘܦܢ̈ܐ ܕܚܝܘܬܝ̈ܗܝ ܒܐܣܟܝܡܐ ܝܘܡܝܐ ܘܐܡܝܢܝܐ.

ܘܓܘ ܕܐܗܐ ܥܕܢܐ ܒܕܟ̣ܪܐ ܗ̄ܘܝܚ ܕܸܡܵܐ ܕܣܗܕܝ̈ܢ ܓܘ ܝܘܡܝܗܝ، ܝܘܡܐ ܕܣܗܕܐ ܐܫܘܪܝܐ، ܐܚܢ̈ܢ ܒܟܠܝܐ ܗ̄ܘܝܚ ܠܘܬ ܡܫܩܠܐ ܚܲܕܬܵܐ ܓܘ ܡܸܐܙܠܬܐ ܕܐܓ̣ܘܢܐ ܐܫܘܪܝܐ ܡܫܘܬܐܣܠܗ ܩܐ ܠܝܗܝ ܩܝܡܬܐ ܕܠܘܡܕܐ ܐܫܘܪܝܐ ܓܘܢܝܐ ܓܘ ܫܒ̣ܥܐ ܐܒ (ܛܒܚ) ܡܢ ܫܢ̄ܬܐ 2005 ܩܐ ܕܗܘܝܐ ܡܫܬܐܣܬܐ ܕܠܘܡܕܐ ܠܪܥܫܬܐ ܠܛ̈ܝܼܡܘܼܵܬܵܐ ܕܐܓ̣ܘܢܐ ܢܡܘܣܝܐ ܡܛܠ ܙܕܩܐ ܐܫܘܪܝܐ ܓܘ ܐܬܪܐ ܚܒܝܒ̣ܐ، ܥܝܪܐܩ ܕܐܕܝܘܡ ܐܫܘܪ ܕܕܥܒ̣ܪ ܘܠܘܡܕܐ ܐܫܘܪܝܐ ܓܘܢܝܐ ܓܘ ܕܟ̣ܪܐ ܕܫܬܐܣܬܗ ܬܠܝܬܝܬܐ ܡܚܬܘܬܐ ܝܠܗ ܕܒ̣ܩܬܗ ܒܐܣ̈ܐ ܐܢ̈ܝ ܕܦܝܫܠܸܗ ܒܢܝܐ ܥܠܝ̈ܗܝ ܘܐܢ̈ܝ ܕܝܪܝܬܝܼܠܸܗ ܡ̣ܢ ܚܲܫܚܵܬ̈ܐ (ܚܒܪ̈ܐ) ܕܦܘܠܚܢܐ ܐܘܡܬܢܝܐ ܐܫܘܪܝܐ ܫܪܫܝܐ ܘܡܗܝܡܢܐ.

 ܝܐ ܒܢ̈ܝ ܥܡܢ  ܕܪܒܢܐ...

ܐܗܐ ܕܟ̣ܪܐ ܕܣܢܝܩܬܐ ܝܠܗ ܟܠܝܬܐ ܠܘܵܬܹܗ ܡܬܚܐ ܝܪܝܚܐ ܩܐ ܝܠܦܬܐ ܕܕܪ̈ܫܐ (ܕܪ̈ܣܐ) ܡܢܗ ܘܩܐ ܕܡܢܫܚ ܠܚܫܐ ܘܡܪܡܚ ܩܠܢ ܒܛܠܒܬܐ ܒܡܫܪܪܬܐ ܕܙܕܩܢ ܢܡܘܣܝܐ ܓܘ ܐܪ̈ܥܬܢ ܬܐܪ̈ܝܚܝܐ (ܬܫܥܝܬܢܝ̈ܐ).

ܐܚܢ̈ܢ ܓܘ ܠܡܕܐ ܐܫܘܪܝܐ ܓܘܢܝܐ ܒܛܠܒܐ ܗ̄ܘܝܚ ܡ̣ܢ ܛܘܟܣܐ ܣܝܣܝܐ ܥܝܪܐܩܝܐ ܕܩܐܡ ܒܡܪܦܝܬܐ ܕܝܪܬܘܬܐ ܕܛܥܝܢܬܐ ܝܠܗ ܡܕܥ̈ܐ ܕܛܘܗܡܝܘܬܐ ܥܠ ܐܣ̈ܐ ܕܫܪܫܐ ܘܕܬܘܕܝܬܐ، ܘܡܥܡܠܬܐ ܒܨܒܘܬܐ ܐܫܘܪܝܬܐ ܒܐܣܟܝܡܐ ܡܠܘܐܝܐ ܠܡܛܝܒ̣ܬܐ ܕܐܝܟܢܘܬ̈ܐ ܩܐ ܐܫܘܪ̈ܝܐ ܠܡܫܘܬܦܬܐ ܓܘ ܒܢܝܬܐ ܕܥܝܪܐܩ، ܐܚܢ̈ܢ ܓܘ ܠܘܡܕܐ ܒܩܪܝܐ ܗ̄ܘܝܚ ܠܟܢܘܫܝܐ ܬܒ̣ܝܠܝܐ ܘܡܛܟܣܝܬ̈ܐ ܬܒ̣ܝ̈ܠܝܐ ܠܥܒ̣ܪܬܐ ܠܡܬܒ̣ܬܐ ܕܣܟ̣ܐ ܠܓܘܢܚ̈ܐ ܕܦܝܫܐ ܝܠܝ̈ܗܝ ܥܒ̣ܝ̈ܕܐ ܒܙܕܩܐ ܕܒܢܘܢ̈ܐ ܕܥܝܪܐܩ ܫܪ̈ܫܝܐ، ܘܡܟܠܝܬܐ ܕܥܡܠܝܬ̈ܐ ܕܡܦܫܪܬܐ ܛܘܗܡܝܬܐ ܐܢ̈ܝ ܕܒܡܛܝܐ ܝܠܝܗܝ ܥܠܝܗܝ ܒܐܣܟܝܡܐ ܐܡܝܢܝܐ ܘܡܛܘܟܣܐ.

ܐܕܝܘܡ ܡܫܬܐܠܢܘܬܢ ܝܠܗ̇ ܪܒܬܐ̣ ܐܝܟ̣ ܛܘܟܣ̈ܐ ܘܥܲܡܵܐ، ܐܝܬܘܬܢ ܥܲܪܲܒ̣ܬܵܐ ܝܠܗ̇ ܒܐܘܪܚܐ  ܕܦܘܠܚܢܢ ܥܡ ܐܗܐ ܩܘܡܬܐ، ܝܪ̈ܬܘܬܢ ܐ̄ܢܫܝ̈ܐ ܘܡܕܝܢܝ̈ܐ ܘܣܝܣܝ̈ܐ ܡܠܝܢ̈ܐ ܥܠܢ ܥܒ̣ܪܬܐ ܠܦܘܪܫܘܢܝܢ ܒܡܕܪܟܢܘܬܐ ܡܢܢ ܘܪܥܫܬܐ ܒܣܢܝܩܘܬܐ ܕܡܫܩܠܐ.

ܐܚܢ̈ܢ ܓܘ ܠܘܡܕܐ ܐܫܘܪܝܐ ܓܘܢܝܐ ܡܩܘܘܠܐ ܗ̄ܘܝܚ ܩܐ ܕܢܛܪܚ ܐܣ̈ܛܘܟ̣ܣܐ ܐܢ̈ܝ ܕܦܣܝܥܠܗ̄ܘܢ ܒܝܝܗܝ ܣܗܕܝ̈ܢ ܒܕܡܝܗܝ̈، ܘܩܐ ܕܗ̄ܘܝܚ ܐܡܝܢܝܐ ܒܡܐܙܠܬܢ ܠܨܘܒ ܢܝܫܐ ܢܡܘܣܝܐ ܒܡܕܥܪܬܐ ܕܙܕܩܐ ܡܕܝܢܝܐ ܘܐܘܡܬܢܝܐ ܠܥܡܢ ܐܫܘܪܝܐ ܫܪܫܝܐ (ܐܨܠܝܐ).

ܫܘܒ̣ܚܐ ܠܣܗܕܝ̈ܢ ܡܬܘܡܝ̈ܐ

ܚܝܐ ܥܡܢ ܐܫܘܪܝܐ

ܚܝܐ ܥܝܪܐܩ ܡܚܝܕܐ

ܠܘܡܕܐ ܐܫܘܪܝܐ ܓܘܢܝܐ  7ܐܒ 2008 ܡ 6758 ܐ